قررت جهات التحقيق المختصة، حجز الفتاة صاحبة فيديو الاعتداء على أحد سائقي سيارات الأجرة “تاكسي” 24 ساعة على ذمة تحريات المباحث؛ وذلك على خلفية اتهامها بالاعتداء على السائق في منطقة المهندسين بالضرب والسب، بسبب خلاف على أولوية المرور بشارع جامعة الدول العربية.
حجز المتهمة بالتعدي على سائق تاكسي بالمهندسين
وكانت شهدت مواقع التواصل الاجتماعي خلال الساعات الماضية انتشار مقطع فيديو على نطاق واسع لفتاة خلال اعتدائها بالسب والضرب على أحد السائقين بمنطقة المهندسين ومحاولة تحطيم سيارته، مما أثار الفيديو غضب مئات المستخدمين.
وألقت الأجهزة الأمنية، القبض على الفتاة، لاتهامها بالاعتداء على سائق تاكسي بالمهندسين بالضرب والسب، بسبب خلاف على أولوية المرور بشارع جامعة الدول العربية.
ومن جانبه، قال س. أ، سائق التاكسي، في تصريحات خاصة لـ القاهرة 24، أنا عندي 26 سنة عمري في حياتي ما تخيلت إن ست في يوم من الأيام تعمل فيا كدا، عايز حقي ورد اعتباري، البنت رفعت عليا الشبشب عشان كانت ماشية عكس في الطريق البطيء بالشارع، ولما وسعت لها تعدي من جنبي رفضت.
وأضاف: أنا مصدوم من الألفاظ الخارجة اللي صدرت من البنت، والشبشب بتاعها اللي رفعته عليا لسه معايا في التاكسي، والناس كلها في المهندسين شافت الواقعة وسمعت اللي حصلي، هي دخلت الطريق البطيء في نفس اتجاه الشارع ووسعت لها عشان تعدي من جنبي، ورفضت تعدي وفضلت تشتم ومكنتش متوقع كل الألفاظ اللي قالتها تطلع من واحدة ست.
وأردف: البنت نزلت من العربية وكلامها زاد عن حده، وصورتها عشان أقدر أجيب حقي، صعبت عليا نفسي، أنا راجل متجوز وعندي عيال، ومرضتش أرد عليها عشان هي ست، بالرغم من إنها كسرت لي العربية وشتمتني وضربتني، والشارع كله شاهد على اللي عملته، أنا خريج سياحة وفنادق شعبة إرشاد سياحي وشغال شيف، وبشتغل على التاكسي عشان أحسن دخلي وأكفي مصاريف المعيشة، وأهلي ناس محترمة ومن عيلة كبيرة، ومكنتش أتوقع إنه يحصلي ده في يوم من الأيام.
