تحدث حسام غالي، عضو مجلس إدارة النادي الأهلي، من خلال تصريحات إعلامية له، عن إمكانية ترشحه لرئاسة القلعة الحمراء بعد عمله خلال السنوات الماضية في مجلس الإدارة برئاسة محمود الخطيب.
حسام غالي: عندي الرغبة أبقى رئيس الأهلي في يوم من الأيام ولكن حاليًا مش قادر أدخل المعركة
وقال حسام غالي: الكلام عن تحضيري لرئاسة الأهلي بالفعل بيضع ضغط كبير عليا، وبالتأكيد نفسي أخدم النادي زي ما خيره عليا إنه وضعني في المكانة دي أمام الجماهير.
وأضاف: ناس كتير وضعت آمال كبيرة عليا، وأنا شايف نفسي رئيس الأهلي وممكن أحقق طموح الجماهير اللي شيفاني رئيس النادي، وممكن أحقق اللي طول عمرهم بيحلموا بيه كمبادئ النادي وشخصيته واسمه علشان أنا حافظهم، ولما دخلت في الإدارة وشوفت الدنيا على حقيقتها مش من بعيد، حسيت إني مش قادر أمسك سيف ودرع وأدخل المعركة دي حاليًا، طول عمري ماسك سيف ودرع وبحارب الناس كلها من وقت ما كنت لاعب صغير لحد ما اعتزلت.
وأستكمل غالي: طول الوقت بحارب الإعلام أو الجمهور أو مدرب مش عايز يلاعبني، ومأخدتش استراحة محارب بعد ما بطلت كورة دخلت في العمل الإداري، وأنا عندي الرغبة أبقى رئيس الأهلي في يوم من الأيام بس حاليًا مش قادر أدخل المعركة، بعد ما شوفت تكالب بني أدمين كتير وصراعات كبيرة إنها تكون في الحتة دي، وتدي كتف أو خنجر للشخص اللي الجمهور شايف إنه الأنسب في المكان دا، وأهم حاجة إننا نشوه الصورة أو الانطباع دا إنه غلط.
